Mae'r British Council yn gweithio ledled y byd i ddatblygu cysylltiadau rhyngwladol sectorau celfyddydau a diwylliant y DU - i gynyddu ymgysylltiad â chynulleidfaoedd rhyngwladol a meithrin brwdfrydedd ac agweddau ffafriol tuag at gelfyddydau a diwylliant y DU. Mae darparu cyfleoedd i weithwyr creadigol proffesiynol feithrin cysylltiadau rhyngwladol pwrpasol yn rhan allweddol o'r gwaith yma, ac rydym yn falch o gynnig grantiau teithio i dir mawr Tsieina i weithwyr ym maes y celfyddydau.

Bydd y grantiau hyn yn rhoi cyfle i gynrychiolwyr sefydliadau celfyddydol yng Nghymru i deithio i dir mawr Tsieina yn 2026 - i feithrin gwell dealltwriaeth o'r tirlun diwylliannol yno, hwyluso cyfleoedd i ymgysylltu â phartneriaid newydd, creu cysylltiadau a gosod sylfeini ar gyfer prosiectau cydweithio yn y dyfodol.

Yn ddiweddar, cyhoeddwyd canllaw gan y British Council, A guide to arts and culture opportunities in Mainland China. Mae'n amlygu rhai o'r cyfleoedd sydd ar gael i weithio yn un o sectorau diwylliannol mwyaf deinamig y byd yn ogystal â rhai o'r heriau, gan gyflwyno enghreifftiau, tystiolaeth a chyngor ar sail profiadau go iawn.

Grantiau Teithio

Maint y Grantiau

Rydym yn cynnig grantiau o hyd at £3,000. Dim ond un grant y flwyddyn y gall unrhyw sefydliad unigol ei dderbyn. Rydym yn rhagweld y byddwn yn gallu cynnig oddeutu pum grant i gyd.

Ar gyfer beth mae'r grant?

Bydd y grant yn galluogi cynrychiolydd o sefydliad celfyddydol yng Nghymru i ymweld â sefydliadau neu wyliau perthnasol yn Tsieina. Bydd yr ymweliad yn gyfle i'r cyfranogwyr gael gwell dealltwriaeth o dirlun diwylliannol Tsieina a meithrin cysylltiadau a fydd o fudd i'w sefydliad yng Nghymru.

Noder - bydd gofyn i ymgeiswyr wneud trefniadau teithio, fisa ac yswiriant eu hunain. Gweler yr adran 'Cyllideb' yn y ddogfen 'Nodiadau i Ymgeiswyr' am enghreifftiau o eitemau/elfennau y gellir defnyddio'r grant ar eu cyfer.

Pethau na ellir defnyddio'r grant ar eu cyfer

Pwrpas y grantiau hyn yw helpu i dalu am dripiau cwmpasu. Ni ellir defnyddio'r grantiau ar gyfer gorbenion, costau rhedeg cyffredinol, ffioedd proffesiynol neu gostau cynhyrchu - fel prynu neu logi deunyddiau, offer, canolfannau, nwyddau a/neu wasanaethau.

Mae'r British Council yn cynnal rhaglenni'n gyson sy'n cynnig grantiau ar gyfer mentrau cydweithio diwylliannol - fel rhaglen Cysylltiadau Drwy Ddiwylliant. Amcan y grant teithio yma yw hwyluso cysylltiadau a allai fod yn sail i gais ar gyfer prosiectau cydweithio yn y dyfodol.

Amserlen

  • Lansio'r Alwad Agored – 8 Rhagfyr 2025
  • Sesiwn Galw Heibio – 8 Ionawr 2026, 10:00-11:00 GMT
  • Dyddiad cau ar gyfer ceisiadau – 8 Chwefror 2026, 23:59 GMT
  • Hysbysu ymgeiswyr llwyddiannus – 2 Mawrth 2026
  • Arwyddo'r cytundeb grant – 16 Mawrth 2026

Bydd y Sesiwn Galw Heibio'n gyfle i ddarpar ymgeiswyr yng Nghymru gwrdd â chydweithwyr o Gymru a Tsieina a fydd yn gallu rhannu gwybodaeth ac ateb cwestiynau. Bydd hefyd yn gyfle i glywed gan gynrychiolydd o sefydliad celfyddydol yn Tsieina a/neu un o dderbynwyr Grant Teithio Gwyliau Tsieina 2025, a fydd yn gallu cynnig mewnwelediad, cyngor a thips defnyddiol wrth rannu eu profiadau ac ateb cwestiynau. Cynhelir y sesiwn yn Gymraeg a Saesneg (darperir gwasanaeth cyfieithu ar y pryd).

Cofrestru ar gyfer y Sesiwn Galw Heibio

Meini Prawf Cymhwystra

Mae croeso i gynrychiolwyr o sefydliadau celfyddydol yng Nghymru i gyflwyno cais. Does dim rhaid i'r cynrychiolydd fod yn aelod o staff y sefydliad, ond bydd gofyn i'r sefydliad gadarnhau fod hawl gan y sawl sy'n ymgeisio i gynrychioli'r sefydliad hwnnw.

Rydym am sicrhau fod hwn yn gyfle cynhwysol. Rydym yn awyddus i glywed gan unigolion o wahanol gefndiroedd a chymunedau, i hybu cydnabyddiaeth a chynyddu amlygrwydd a dylanwad menywod, pobl ag anabledd a chymunedau eraill sydd heb gynrychiolaeth ddigonol mewn mentrau cydweithio creadigol rhyngwladol.

Bydd gofyn i gynrychiolwyr y sefydliadau celfyddydol yng Nghymru sy'n ymgeisio ddangos eu bod yn gallu cefnogi prosiectau cydweithio gyda phartneriaid yn Tsieina yn y dyfodol. Does dim rhaid iddynt fod yn Gyfarwyddwyr Artistig, ond bydd gofyn iddynt allu dangos (e.e. drwy lythyr yn cadarnhau cefnogaeth Cyfarwyddwr eu Sefydliad) fod ganddynt awdurdod i ddatblygu prosiectau yn y dyfodol ar ran y sefydliad.

  • Gan mai nod y grantiau teithio hyn yw datblygu cysylltiadau sefydliadol a threfniadol, ni all artistiaid unigol neu lawrydd ymgeisio oni bai eu bod yn gweithio naill ai'n uniongyrchol gyda, neu ar ran, sefydliad celfyddydol yng Nghymru
  • Nid yw cyrff ariannu na chwmnïau nid er elw yn gymwys i wneud cais am y grantiau teithio hyn.
  • Ni fwriedir i'r grantiau hyn gefnogi cysylltiadau academaidd.
  • Nid yw ymgeiswyr sy'n byw y tu allan i Gymru yn gymwys i geisio am y grantiau hyn, heblaw eu bod yn byw y tu allan i Gymru dros dro a bod ganddynt gyfeiriad cartref yng Nghymru (yn unol â diffiniad Tollau a Refeniw Ei Fawrhydi o hynny o ran amodau 'preswylio yn y DU' at ddibenion trethol - gweler yma).
  • Mae'r cyfle hwn yn agored i gynrychiolwyr sefydliadau celfyddydol a diwylliannol sydd wedi'u cofrestru yng Nghymru. Rhaid i sefydliadau cymwys fod yn weithredol ac yn gweithio yn y sector(au) diwylliannol a/neu greadigol yn unrhyw un o'r ffurfiau celf canlynol:
    - Ffilm
    - Technoleg greadigol (gan gynnwys gemau, trochol, cymysg, realiti estynedig a realiti rhithwir)
    - Llenyddiaeth
    - Celfyddydau Gweledol

    - Theatr a Dawns (gan gynnwys Syrcas)
    - Pensaernïaeth, dylunio a ffasiwn (gan gynnwys crefftau)
    - Cerddoriaeth 

  • Rydym hefyd yn croesawu cynigion gan sefydliadau sy'n gweithio ar:
    - brosiectau ar draws gwahanol ffurfiau celf
    - prosiectau â themâu sy'n berthnasol i'r economi greadigol
    -  prosiectau celf traws-ddisgyblaeth (e.e. celf + gwyddoniaeth, celf + technoleg)

 

Asesu

Caiff pob cais ei werthuso gan y British Council ar sail y meini prawf ac ystyriaethau canlynol:

Ansawdd – Mae'r sefydliad sy'n anfon cynrychiolydd yn sefydliad o ansawdd artistig/creadigol uchel sydd â'r gallu i ddatblygu cysylltiadau rhyngwladol. 25%
Addasrwydd – Mae'r trip arfaethedig yn berthnasol ac yn creu cyfleoedd i'r sefydliad gynyddu ei ddealltwriaeth o'r sector diwylliannol yn Tsieina yn ogystal â datblygu rhwydweithiau â chydweithwyr ar dir mawr Tsieina. 25%
Cynllunio – Mae'r trip arfaethedig wedi'i gynllunio'n dda, gydag adnoddau digonol ar gael. 25%
Cynhwysiant - Mae'r cais yn hybu cydnabyddiaeth a chynyddu amlygrwydd a dylanwad menywod, pobl anabl a gweithwyr creadigol proffesiynol eraill sydd heb gynrychiolaeth ddigonol yng Nghymru. 25%

Manylion Cyflwyno Cais

Dylech ddefnyddio'r ffurflen ar-lein yma i anfon eich cais

Dim ond un cais yn unig a ganiateir gan bob ymgeisydd.

Cael Cymorth i Gyflwyno Eich Cais

Gallwch wneud cais am gymorth hygyrchedd i dalu am dreuliau sy'n codi wrth gwblhau'r ffurflen gais hon. Gall costau cymorth hygyrchedd gynnwys gweithwyr cymorth hygyrchedd, dehonglwyr iaith arwyddion, adnoddau technegol neu gefnogaeth iechyd meddwl. Caiff y treuliau hyn eu diffinio fel unrhyw gostau sy'n codi oherwydd anabledd nad oes rhaid i eraill eu talu wrth wneud cais. Mae'r cymorth yma ar gael i bob ymgeisydd ag anabledd, p'un a fydd eu cais yn llwyddiannus ai peidio.

Mae'r cymorth ar gael ar ddwy amod:

1: Eich bod yn cwblhau pob rhan o'r ffurflen gais a llwytho pob dogfen ategol ofynnol i fyny.

2: Ein bod yn derbyn eich cais erbyn y dyddiad cau.

Gallwch wneud cais am gostau cymorth hygyrchedd drwy gwblhau Adran C y Ffurflen Gais ('Treuliau hygyrchedd ar gyfer cwblhau'r ffurflen gais').

Noder na fyddwn yn asesu ceisiadau ar sail ansawdd y defnydd o Gymraeg neu Saesneg ysgrifenedig.

Cymorth Hygyrchedd ar gyfer y trip

Mae cymorth ychwanegol ar gael ar gyfer costau hygyrchedd eich trip arfaethedig. Rhoddir ystyriaeth i'r rhain wrth asesu eich cais. Rhowch fanylion am unrhyw gymorth hygyrchedd ychwanegol sydd ei angen arnoch ar gyfer eich trip arfaethedig, a nodwch yr hyn sydd ei angen arnoch.

Canllaw i Ymgeiswyr

Gellir lawrlwytho nodiadau i ymgeiswyr drwy'r ddolen ar waelod y ddalen hon. Mae'r ddogfen yn cynnwys manylion llawn ar gyfer cyflwyno cais.

Cysylltu 

Os oes unrhyw gwestiynau pellach gennych, cysylltwch â ni yma: Arts@britishcouncil.org.cn
Share this